Merih Demiral kom Juventus yfir á 3. mínútu eftir aukaspyrnu frá Miralem Pjanic. Demiral náði að pota boltanum inn og gestirnir komnir yfir.

Roma-menn voru enn sofandi þegar Pau Lopez ætlaði að senda á Jordan Veretout en hann bjóst ekki við sendingunni og barst boltinn því á Paulo Dybala. Veretout braut á Dybala innan teigs og vítaspyrna dæmd.

Cristiano Ronaldo steig á punktinn og skoraði. Sjötti deildarleikurinn í röð þar sem hann skorar. Stuttu síðar var Lorenzo Pellegrini nálægt því að minnka muninn en Adrien Rabiot rétt náði að koma í veg fyrir mark á síðustu stundu.

Roma kom öflugt inn í síðari hálfleikinn en Edin Dzeko átti skot í stöng og þá bjargaði Alex Sandro á línu eftir skalla Cengiz Under en þegar VAR skoðaði það atvikið nánar þá var það ljóst að brasilíski bakvörðurinn handlék knöttinn.

Vítaspyrna dæmd og skoraði Diego Perotti úr henni. Aleksandr Kolarov fékk þá gullið tækifæri til að skora eftir aukaspyrnu Pellegrini en skalli hans fór beint á Wojciech Szczesny.

Lokatölur 2-1 fyrir Juventus og fara meistararnir á toppinn á nýjan leik með 48 stig, tveimur meira en Inter.

Roma 1 - 2 Juventus
0-1 Merih Demiral ('3 )
0-2 Cristiano Ronaldo ('10 , víti)
1-2 Diego Perotti ('68 , víti)

Verona 2 - 1 Genoa
0-1 Antonio Sanabria
1-1 Valerio Verre (víti)
2-1 Mattia Zaccagni.