KR reynir að fæla falldrauginn úr Vesturbænum
Atburðarásin hjá KR síðasta árið hefur verið með hreinum ólíkindum og gengi liðsins í sumar verið í órafjarlægð frá væntingum. Liðið er þremur stigum frá fallsæti en getur komið sér í mun betri mál með sigri á morgun.

KR vann öflugan 4-2 sigur gegn ÍA í síðasta leik, þar sem Benoný Breki Andrésson var magnaður og skoraði þrennu. Það er skammt stórra högga á milli hjá KR en liðið mun heimsækja Val á mánudag, áður en deildinni verður skipt upp þar sem innbyrðis leikir í neðri hlutanum bíða liðsins.

Víkingur getur komist á toppinn
Sölvi Geir Ottesen stýrir Víkingi frá hliðarlínunni á morgun en eftir æsilegan endurkomusigur gegn Val í upphafi mánaðarins mun liðið komast á topp Bestu deildarinnar að nýju með því að vinna leikinn.

Víkingur getur jafnað Breiðablik að stigum að toppnum en þar sem liðið er með betri markatölu þá fer það þá í efsta sætið. Það stefnir allt í æsispennandi einvígi milli Víkings og Breiðabliks um Íslandsmeistaratitilinn og stórskemmtilega baráttu í efri hlutanum.

Erfiður heimavöllur
KR-ingum líður ekkert sérstaklega vel heima hjá sér og eru neðstir þegar kemur að árangri á heimavelli. Liðið hefur aðeins unnið tvo af tíu heimaleikjum og Meistaravellir aðeins skilað samtals tíu stigum heim á bæ.

Jafntefli í fyrri viðureign þessara liða
Þegar Víkingur tók á móti KR í 11. umferð, þann 22. júní, enduðu leikar með jafntefli 1-1. Matthías Vilhjálmsson kom Víkingi yfir á sjöundu mínútu Theodór Elmar Bjarnason jafnaði. Fleiri urðu mörkin ekki.

KR-ingar voru mjög varnarsinnaðir í leiknum en þetta var fyrsti leikur þeirra undir stjórn Pálma Rafns Pálmasonar sem tók við liðinu til bráðabirgða eftir að Gregg Ryder var rekinn.

Af hverju er Arnar í banni?
Það er vafalítið svekkjandi að Óskar og Arnar mætist ekki á hliðarlínunni. Arnar fékk sitt annað rauða spjald á tímabilinu þegar hann trylltist út í dómarann í jafntefli gegn Vestra. Hann var dæmdur sjálfkrafa í tveggja leikja bann og fékk aukaleik fyrir ósæmilega hegðun. Eftir leikinn á morgun hefur hann lokið afplánun á þessu þriggja leikja banni.

Hver mun dæma leikinn?
Elías Ingi Árnason dæmir leikinn á morgun en hann hefur verið einn besti dómari deildarinnar í sumar. Gylfi Már Sigurðsson og Guðmundur Ingi Bjarnason verða aðstoðardómarar og fjórði dómari verður Aðalbjörn Heiðar Þorsteinsson.

Leikur KR og Víkings verður klukkan 17:00 á morgun, föstudaginn 13. september