Lionel Messi hefur aðeins skorað í átta af síðustu 24 landsleikjum fyrir Argentínu en hann var áberandi í þessum leik gegn Paragvæ og átti meðal annars sláarskot úr aukaspyrnu.

Hann náði að skora eftir frábært spil og fagnaði innilega þegar hann hélt að hann væri að koma Argentínu yfir 2-1. En brasilískur dómari leiksins, Raphael Claus, dæmdi markið af eftir að hafa farið í VAR skjáinn.

Claus fann brot sem var framið úti á miðjum velli 27 sekúndum áður en boltinn endaði í netinu. Messi var verulega pirraður út í dómarann í leiknum en snemma í leiknum vildi Argentína fá vítaspyrnu en Claus dæmdi ekkert.

„Þú klúðraðir þessu fyrir okkur tvisvar," kallaði Messi á dómarann eftir lokaflautið, bálreiður. „Þetta er ótrúlegt, algjörlega til skammar!"

Argentína er á toppi undankeppninnar en Brasilía getur hirt toppsætið með því að vinna Venesúela. Messi og félagar mætar Perú á þriðjudaginn.