Karen María Sigurgeirsdóttir átti frábæran leik þegar Þór/KA lagði Keflavík í Boganum í kvöld. Fótbolti.net ræddi við hana í leikslok.
Lestu um leikinn: Þór/KA 4 - 0 Keflavík
„Ég skoraði fyrsta markið mitt í deildinni svo ég get ekki sagt annað en bara geggjað. Mér fannst við eiga góðan leik, við leyfðum þeim aðeins að komast inn í leikinn á köflum en fínt heilt yfir," sagði Karen María.
Karen skoraði fjórða mark liðsins en var nálægt því að skora þriðja markið en Margrét Árnadóttir fylgdi eftir skoti hennar sem fór í stöngina.
„Ég var smá svekkt því ég var þá ekki búin að skora fyrsta markið mitt en það var gaman líka fyrir Möggu að skora," sagði Karen María.
Ísfold Marý skoraði annað mark sitt á tímabilinu en Karen og Margrét sitt fyrsta. Annars hefur Sandra María skorað hin níu mörk liðsins.
„Já loksins einhver önnur en Sandra, hún getur ekki gert allt," sagði Karen María á léttu nótunum.
