ÍBV vann nauman sigur á Aftureldingu í fyrsta leik níundu umferðar í Bestu deild kvenna.
Afturelding var mun sterkari aðilinn í fyrri hálfleik og því var það högg fyrir þær er Olga Sevcova, sem hefur verið frábær í sumar, skoraði fyrsta mark leiksins á 44. mínútu. Markið gerði hún eftir frábæra sendingu frá Ameera Abdella Hussen.
Markið kom á versta tíma fyrir heimakonur, rétt fyrir leikhlé. Afturelding náði ekki að fylgja eftir flottum fyrri hálfleik og skapaði sér ekki mörg færi á seinni 45 mínútunum.
Gestirnir frá Vestmannaeyjum voru líklegri til að bæta við mörkum í seinni hálfleik en fleiri urðu þau ekki og lokatölur því 0-1 í Mosfellsbæ.
ÍBV hefur verið að gera vel í sumar og fer upp í annað sæti deildarinnar með 17 stig. Frábær árangur hjá Jonathan Glenn sem er á sínu fyrsta tímabili sem þjálfari í meistaraflokki. Afturelding er aftur á móti bara með þrjú stig og er í næst neðsta sæti.
Heil umferð í kvöld
Það er ekki líklegt að ÍBV verði í öðru sæti þegar búið er að flauta til leiksloka í öllum leikjum kvöldsins því það fer fram heil umferð. Hér að neðan má sjá hvaða leikir eru spilaðir.
Leikir sem eru í gangi:
Selfoss 0 - 1 Valur
Keflavík 0 - 0 Stjarnan
Þór/KA 1 - 2 KR
Að hefjast:
20:15 Þróttur R. - Breiðablik
Allir leikirnir eru í beinni textalýsingu hér á Fótbolta.net. Hægt er að nálgast lýsingarnar á forsíðunni.
Athugasemdir