Þessir geta verið svekktastir að vera ekki í hópnum

Sveinn Aron Guðjohnsen - Hefur verið í öllum hópum frá því í mars 2021. Þá var hann kallaður inn úr U21 landsliðinu fyrir einmitt leik gegn Liechtenstein. Augljóslega mjög hæfileikaríkur en hefur vantað að sýna virkilega góðar frammistöður með landsliðinu. Er á meðal varamanna fyrir komandi verkefni.

Hákon Rafn Valdimarsson - Aðalmarkvörður Elfsborg í sænsku úrvalsdeildinni. Gæti horft í að varamarkvörður Midtjylland, Elías Rafn Ólafsson, er í hópnum en ekki hann.

Birkir Bjarnason - Leikjahæsti leikmaður liðsins og hefur alltaf svarað kallinu, ekki verið í hóp með félagsliði sínu að undanförnu og er að reyna losna þaðan.

Willum Þór Willumsson - Hefur spilað vel í Hollandi á tímabilinu en hefur misst úr vegna meiðsla, hefur ekki spilað í þremur síðustu leikjum. Margir sem bíða eftir að sjá Willum með landsliðinu.

Guðmundur Þórarinsson - Stóð sig vel í síðustu undankeppni en hefur eftir það ekki verið valinn. Ekki hægt að segja að hann hafi spilað sig úr hópnum. Er á meðal varamanna í þessu verkefni.

Dagur Dan Þórhallsson - Er að spila vel með Orlando í Bandaríkjunum, stóð sig vel í janúarverkefninu og er á góðri vegferð með sinn feril. Er á meðal varamanna í þessum hópi.

Valgeir Lunddal Friðriksson - Ekki oft sem leikmaður sænsku meistaranna er ekki í íslenska landsliðshópnum. Þetta rauða spjald gegn Tékkum með U21 gæti hafa spilað inn í valið, kæmi einungis til greina í seinni leikinn í þessu verkefni vegna leikbanns.