Pep Lijnders
Pep Lijnders og Gary O'Neil eru taldir líklegastir til að taka við stjórastöðunni hjá enska B-deildarfélaginu Norwich City.
Norwich lét danska þjálfarann Johannes Thorup taka poka sinn í síðasta mánuði og ætlar félagið að fara vel og vandlega yfir þá kosti sem standa liðinu til boða í sumar.
Samkvæmt Sky eru Lijnders og O'Neil efstir á blaði, en Lijnders var aðstoðarmaður Jürgen Klopp hjá Liverpool og tók síðar við RB Salzburg, en entist ekki lengi í Austurríki.
O'Neil hefur áður stýrt Bournemouth og Wolves, en hann var rekinn frá Úlfunum undir lok síðasta árs.
Félagið ætlar að ræða við báða aðila á næstu dögum og er þá ljóst að Jack Wilshere mun ekki halda áfram sem stjóri liðsins.
Wilshere var ráðinn til bráðabirgða eftir að Thorup var rekinn og stýrði hann liðinu í síðustu tveimur leikjunum. Hann vann einn og gerði eitt jafntefli, en Norwich hafnaði í 13. sæti, ellefu stigum frá umspili.
Athugasemdir
