Árni Freyr og Fylkir eru í vandræðum, með aðeins fimm stig úr fyrstu sex leikjum sumarsins.
„Við erum bara í brekku og nær því að vera í fallbaráttu heldur en að vera í efri hlutanum. Við náum ekki að vinna leik og það er mjög langt síðan við gerðum það síðast. Við þurfum að átta okkur á því að við erum í vondri stöðu" sagði Árni Freyr Guðnason þjálfari Fylkis eftir 1-2 tap heima gegn botnliði Leiknis í Lengjudeild karla í kvöld. En afhverju er gengið svona?
Lestu um leikinn: Fylkir 1 - 2 Leiknir R.
„Ef ég vissi það þá værum við kannski ekki í þessari stöðu. Við erum að komast í mjög góðar stöður en sköpum ekki nógu mikið af færum í dag. Við fáum á okkur 3-4 sóknir í leik og það endar með 1-2 mörkum. Þeir skoruðu úr einu sókninni sinni í fyrri hálfleik og svo skoruðu þeir uppúr klafsi, ég sá reyndar ekki annað markið. Við erum bara í veseni að verjast þessum skyndisóknum og veseni að búa okkur til færi," hélt hann áfram.
„Úti á velli erum við með boltann allan tímann og náum að tengja saman sendingar og komast í þessi svæði sem við viljum fá, en erum ekki nógu dýnamískir í kringum teiginn til að búa okkur til betri stöður. Ég man ekki eftir mörgum dauðafærum sem við klikkum, aðeins þarna í byrjun bara. Þetta var flatt og hægt og það vantar kraft í okkur. Við þurfum einhvern veginn að snúa þessu við."
Eftir að Leiknir komst í 0-2 var Árni Freyr fljótur að bregðast við og gerði fjórfalda skiptingu. Brást honum þolinmæðin?
„Nei, ég var eiginlega búinn að ákveða að gera hana. Ég var bara að tala við leikmennina sem komu inná þegar þeir skoruðu, það var ekki afþví þeir skoruðu annað markið," sagði hann.
Skiptingin var reyndar fljót að skila sér því strax í kjölfarið skoraði varamaðurinn Þóroddur Víkingsson mark Fylkis með sinni fyrstu snertingu.
„Já já, Þóroddur er búinn að vera meiddur síðan í febrúar og skoraði í þeim fáu leikjum sem hann spilaði í vetur. Hann er með markanef og gerði það vel, hinir sem komu inná komu með smá kraft en það er eins og liðið sem byrjaði, þeir er kraftur í byrjun en svo deyr það út. Þetta er eitthvað sem ég hef áhyggjur af."
Má búast við að þú gerir þá róttækar breytingar á liðinu fyrir næsta leik?
„Ef ég myndi ákveða liðið núna þá já, en svo horfi ég aftur á þetta og við þurfum að halda í hugmyndafræðina okkar. Það er ömurlegt að tala um þetta núna en tölfræðin er öll með okkur í liði, við erum með boltann og viljum vera með boltann og komast í ákveðnar stöður og erum að ná því. En við erum ekki að ná að búa okkur til færi og kannski þurfum við að taka eitt skref aftur á bak til að taka annað áfram."
Eina tölfræðin sem skiptir máli er samt fimm stig úr sex leikjum er það ekki?
„Já, og við erum ekki að skora. Við erum búnir að skora sex mörk eða eitthvað. Við erum í smá vandræðum og þurfum að snúa þessu við."
Athugasemdir
