„Það skipti öllu máli fyrir mig"

„Það eru engar viðræður í gangi. Tíminn mun bara leiða það í ljós hvenær eitthvað gerist í þeim efnum. Ég byrjaði tvo leiki og kom inn á í tveimur leikjum í ágúst, en gat ekki spilað síðustu leiki vegna veikindanna," segir Arnór.

„Mér líður mjög vel hérna, Blackburn er mjög flottur klúbbur og tímabilið hefur byrjað mjög vel."

Arnór skoraði sigurmarkið gegn Oxford í 3. umferð Championship-deildinni eftir að hafa komið inn á sem varamaður.

„Það var mikilvægt fyrir mig. Endirinn á síðasta tímabili var sorglegur, lendi í erfiðum meiðslum með landsliðinu og endurkomuferlið var erfitt, erfiðara en ég bjóst við. Það skipti öllu máli fyrir mig að koma inn á og ná að setja sigurmarkið í 2-1 sigri. Það kom tímabilinu í gang hjá mér persónulega."

Var eitthvað að gerast varðandi áhuga annarra félaga í sumar?

„Það voru alveg félög sem létu vita af áhuga sínum, en ég var alveg einbeittur á að vera hérna og taka gott tímabil með Blackburn. Það var mikið slúðrað, en það voru alveg félög sem létu vita af sér," segir Arnór.

Arnór kom til Blackburn frá CSKA Moskvu síðasta sumar, fyrst á láni, og skrifaði síðan undir eins og hálfs árs samning í lok síðasta árs.