England: Deeney klúðraði víti í markalausu jafntefli

Watford tók á móti Tottenham í fyrsta leik helgarinnar í ensku úrvalsdeildinni og reyndist leikurinn nokkuð bragðdaufur.

Bæði lið áttu nokkuð mikið af marktilraunum en þær voru flestar arfaslakar og rötuðu aðeins 6 skot af 30 á markrammann. Bæði lið komust í fínustu færi en nýtingin var skelfileg.

Besta færi leiksins fékk Troy Deeney á 70. mínútu þegar hann lét Paulo Gazzaniga verja vítaspyrnu frá sér.

Tottenham tókst næstum að stela sigrinum í uppbótartíma þegar Erik Lamela náði að setja fót í knöttinn og beina honum í átt að netinu. Ignacio Pussetto, sem er nýkominn til félagsins, tókst þó að bjarga á marklínunni. Boltinn var millimetrum frá því að vera allur kominn yfir línuna, en lokatölur urðu 0-0.

Nigel Pearson hefur farið feykilega vel af stað með Watford og er liðið tveimur stigum frá fallsvæðinu sem stendur.

Jose Mourinho er hins vegar ekki að gera nógu góða hluti hjá Tottenham, sem er þremur stigum frá Evrópusæti og hefur ekki unnið neinn af síðustu fjórum deildarleikjum sínum.

Eftir skamma stund fara sex aðrir úrvalsdeildarleikir af stað. Arsenal, Manchester City og Everton mæta þar öll til leiks.