Sænska félagið Kristianstad er úr leik í forkeppni Meistaradeildarinnar eftir tap gegn Ajax frá Hollandi í dag. Leikurinn fór fram í Danmörku og endaði 3-1 fyrir Ajax.
Kristianstad tók forystuna í leiknum eftir 19 mínútur og leiddi þegar búið var að flauta til hálfleiks.
En í seinni hálfleik gekk Ajax á lagið og vann að lokum flottan sigur. Þær skoruðu tvisvar á síðustu tíu mínútum leiksins.
Elísabet Gunnarsdóttir er þjálfari Kristianstad en hún er tvisvar búin að koma liðinu í Meistaradeildina. Íslenska landsliðskonan Amanda Andradóttir kom inn á sem varamaður á 73. mínútu í dag en Emelía Óskarsdóttir, sem er 16 ára, var ónotaður varamaður.
Afar svekkjandi úrslit hjá Kristianstad sem er úr leik í Meistaradeildinni. Kristianstad hafði fyrir leikinn í dag unnið níu leiki í röð, en núna fer einbeitingin öll á deildina þar sem liðið er í baráttu um titilinn.
Portúgalska félagið Benfica komst áfram í úrslitaleik á sunnudaginn með því að vinna 9-0 sigur gegn Hajvalia frá Kosóvó. Cloe Lacasse, sem er með íslenskan ríkisborgararétt, lét sér nægja að skora eitt af mörkum Benfica.
Fyrr í dag vann Valur 2-0 sigur gegn Hayasa frá Armeníu. Valur klárar þetta með sigri og mætir sigurliðinu úr leik Pomurje frá Slóveníu og Shelbourne frá Írlandi í úrslitum á sunnudag. Sigurliðið þar mun komast í 2. umferð forkeppninnar.
Síðar í dag spilar svo Breiðablik við Rosenborg frá Noregi. Verður það mjög athyglisverður leikur.
Athugasemdir