Sigurinn gegn Fylki var svona nánast unninn með vinstri, eins og réttfættir tala stundum um, svo auðveldur virkaði sá sigur. Valsmenn stóðust lágmarkskröfuna þar, vel gert.

Í kjölfarið lék Valur svo fyrri leikinn gegn Vllaznia og var sýnilega talsvert betra liðið, en einhvern veginn fór það þó þannig að Valsarar voru stálheppnir að leikurinn á N1 vellinum endaði með jafntefli. Ekki neinu til að hrósa þar, nema því að menn gáfust aldrei upp.

Loks var það svo leikurinn úti í Albaníu í gær, aðstæður erfiðar; gífurlegur hiti og öðruvísi stemning að fara inn í þann leik eftir líflátshótanir í Lollastúku viku áður.

Valsmenn sýndu frábæran leik í gær og unnu mjög sannfærandi sigur, pökkuðu Albönunum saman og áttu frábæra spilkafla; eitthvað sem allir vita að býr í liðinu sem er einstaklega vel mannað.

Kremið á kökuna var svo fjórða markið þar sem Gylfi Þór Sigurðsson átti gullsendingu á Tryggva Hrafn sem kláraði með frábærri vippu yfir markvörð albanska liðsins.

Víðir Sigurðsson vakti athygli á því að þetta væri einn af fimm stærstu sigrum í sögunni hjá íslenskum liðum á útivelli í Evrópukeppni. Virkilega vel gert það hjá Valsmönnum og eiga þeir hrós skilið fyrir. Vel gert Arnar Grétarsson og Valsarar.

Þeir eru fimm stigum á eftir Víkingi í Bestu deildinni sem heldur áfram um helgina. Valur á útileik á mánudag áður en St. Mirren kemur svo í heimsókn á Hlíðarenda í 2. umferð forkeppninnar í Evrópu.