Manchester City fékk Tottenham í heimsókn í annað sinn á fjórum dögum. Þetta var þriðja innbyrðisviðureign liðanna á ellefu dögum.

Tottenham komst áfram á útivallarmörkum í útsláttarkeppni Meistaradeildarinnar en vörn City stóð sig talsvert betur í dag heldur en á miðvikudaginn.

Hinn ungi Phil Foden fékk tækifæri með byrjunarliðinu og var David Silva settur á bekkinn í hans stað. Foden var ekki lengi að endurlauna traustið því hann skoraði sitt fyrsta úrvalsdeildarmark strax á fimmtu mínútu leiksins.

Sergio Agüero skallaði þá boltann fyrir Foden sem skutlaði sér og skallaði hann í netið af stuttu færi framhjá hjálparlausum Paulo Gazzaniga.

Son Heung-min var stórhættulegur eins og áður gegn City en tókst ekki að skora. Bæði lið fengu færi til að skora áður en flautað var til leikhlés en inn fór boltinn ekki. Tottenham fékk betri færi en City fleiri.

Heimamenn voru þéttari eftir leikhlé og komst Raheem Sterling nálægt því að skora en Gazzaniga átti góðan leik í marki gestanna.

City hélt boltanum vel og áttu gestirnir erfitt með að halda boltanum þegar þeir náðu honum. Síðustu mínúturnar voru óþægilegar fyrir City en Tottenham náði ekki að skapa hættu og uppskáru Englandsmeistararnir mikilvægan sigur í titilbaráttunni.

Myndbandstæknin var í lykilhlutverki er Tottenham sló Man City úr Meistaradeildinni en hún er ekki enn kominn í ensku úrvalsdeildina. Úrslitin hefðu verið öðruvísi með myndbandstækni því Tottenham vildi fá vítaspyrnu þegar Kyle Walker handlék boltann í eigin vítateig.