KR ræddi við Jökul í vetur - Útskýrir af hverju KR samdi við írskan markvörð

Guy Smit hefur ekki farið vel af stað í markinu hjá KR og verður hann í leikbanni í næsta leik eftir að hafa fengið tvö gul spjöld gegn KA í gær.

Fótbolti.net ræddi við Gregg í dag og var hann spurður út í Jökul og hvort eitthvað væri til í þessum sögusögnum.

„Ég hef ekkert um það að segja. Allt sem ég veit er að við ræddum við hann fyrir áramót og hann var þá samningsbundinn í eitt og hálft ár. Núna á hann því ár eftir af samningi. Hann er samningsbundinn öðru félagi."

Alveg eins og að fá íslenskan leikmann
KR fékk Sam Blair í sínar raðir í vetur. Blair var þar á undan á mála hjá Norwich á Englandi. Hann var í byrjunarliðinu gegn KÁ í Mjólkurbikarnum en fékk að líta rauða spjaldið og spilar því ekki næsta bikarleik. Hann hefur ekki verið á varamannabekknum hjá KR í deildinni. Þar hefur Sigurpáll Sören Ingólfsson, uppalinn KR-ingur, verið og kom hann inn í leikinn gegn KA í gær.

„Spalli var mjög góður á undirbúningstímabilinu, var sá sem spilaði flesta leiki þar. Hann hefur líka gert mjög vel á æfingum og við höfum mikla trú á honum."

„Sam var á Íslandi þegar við fengum hann, ég veit að hann er erlendur leikmaður, með írskt vegabréf, en hann bjó hér og þetta var því í raun alveg eins og að fá íslenskan leikmann. Við vildum hafa þrjá markverði og þess vegna fengum við hann inn. Hann öðlaðist góða reynslu hjá Norwich og er mjög góður á æfingum. Það var gott að fá hann inn."

Dómarinn hafi beðist afsökunar á seinna gula spjaldinu
Gregg var spurður út í fyrra gula spjaldið sem Guy Smit fékk í gær. Hollendingurinn braut á Ásgeiri Sigurgeirssyni fyrir utan teig og fékk gult spjald. KA menn í stúkunni kölluðu eftir rauðu en þeir Ásgeir og Hallgrímur Jónasson þjálfari hefðu viljað sjá dómarann leyfa Ásgeiri að klára stöðuna sem var komin upp því Ásgeir stóð strax á fætur og ætlaði að halda áfram þegar flautið kom.

„Ég er búinn að sjá þetta en þetta sést ekki vel í þeirri upptöku sem ég skoðaði, ég sá þetta því ekki vel. Ég á eftir að skoða þetta í sjónvarpsupptökunni."

Gregg sagði í gær að seinna gula spjaldið hefði verið alltof strangt. Hann er áfram á þeirri skoðun. Guy var búinn að fá aðvörun um leiktöf fyrr í leiknum og Twana Khalid Ahmed, dómari leiksins, veitti honum í þessu tilviki seinna gula spaldið fyrir leiktöf.

„Eins og ég sagði í gær þá trúi ég þessu ekki. Ég ræddi við dómarann eftir leikinn og hann eiginlega baðst afsökunar á því. Ég held að hann hafi áttað sig á því að hann gerði mistök. Dómarinn var kannski of fljótur að flauta í mörgum atvikum í leiknum og ég held að KA sé á sama máli. Í þessu fyrra gula spjaldi var hann kannski of fljótur að flauta brotið og það var svolítið í takti við leikinn."

Þjálfarinn segir að hópurinn hafi komið vel út úr leiknum. „Menn eru augljóslega pirraðir að hafa ekki unnið eftir að hafa leitt í einhverjar 77 mínútur. Við erum vonsviknir með að taka ekki þrjú stigin en frammistaðan var fín."

Styttist í Aron og Elmar
Gregg sagði þá frá því að þeir Aron Sigurðarson og Theodór Elmar Bjarnason ættu að snúa aftur á næstu tveimur vikum.

KR á næst leik gegn HK í Bestu deildini á sunnudag, svo bikarleik gegn Stjörnunni og svo deildarleik gegn FH um aðra helgi.

Viðtalið við Gregg frá því í gær má nálgast í spilaranum hér að neðan. Þar ræðir hann nánar um Guy Smit.