Mikel Arteta var skiljanlega svekktur eftir að lærisveinar hans í Arsenal töpuðu fyrir Nottingham Forest í ensku úrvalsdeildinni í dag en þetta þýðir að titilbaráttan er endanlega úti.
Tapið þýðir það að Manchester City er Englandsmeistari þriðja árið í röð.
Arsenal var í bílstjórasætinu stærstan hluta tímabilsins en síðan slokknaði á liðinu í apríl og maí á meðan Man City setti í fimmta gír.
„Ég á erfitt með að hugsa út í þetta núna. Við verðum að óska Man City til hamingju,“ sagði Arteta eftir leikinn.
„Þetta hefur verið ótrúleg vegferð hjá okkur núna í tíu mánuði þar sem við höfum barist við Man City og við vorum fyrir ofan þá í svo langan tíma. Við vorum ákveðnir í reyna að ná einhverju meira en við náðum því ekki.“
„Við höfum lært gríðarlega mikilvæga lexíu. Þetta félag hefur umbreyst mikið og tekið stór skref en það hefði verið kremið á kökuna að vinna deildina en því miður vantaði eitthvað uppá.“
„Síðustu vikur hafa verið erfiðar. Við þurftum alla til að vera upp á þeirra besta í apríl og maí en það varð ekki raunin. Þetta verður sársaukafullt í dag og á morgun en svo verðum við að gefa stuðningsmönnunum þá frammistöðu sem þeir eiga skilið í næstu viku,“ sagði Arteta í lokin.
Athugasemdir