Bayern München tapaði mikilvægum leik gegn RB Leipzig í dag, 3-1, í næst síðustu umferð þýsku deildarinnar.

Heimamenn í Bayern fóru með 1-0 forystu inn í hálfleikinn þökk sé marki Serge Gnabry en Leipzig kom inn í síðari hálfleikinn af krafti.

Konrad Laimer jafnaði metin á 64. mínútu áður en Benjamin Pavard braut af sér í teignum á 75. mínútu. Christopher Nkunku skoraði úr vítinu áður en Noussair Mazraoui handlék knöttinn klaufalega í teignum níu mínútum síðar.

Dominik Szoboszlai fór á punktinn í síðara skiptið og gerði út um leikinn. Lokatölur 3-1 fyrir Leipzig sem er búið að tryggja Meistaradeildarsæti fyrir næsta tímabil en titillinn er að renna úr greipum Bayern sem er á toppnum með 68 stig.

Borussia Dortmund mætir Augsburg á morgun og ef liðið vinnur þar er það komið í lykilstöðu fyrir lokaumferðina.