Portúgalski vængmaðurinn Nani skoraði úr vítaspyrnu fyrir Orlando á 5. mínútu leiksins en gestirnir frá New York jöfnuðu aðeins mínútu síðar.

Undir lok leiksins fékk Ruan, varnarmaður Orlando, að líta rauða spjaldið og spiluðu því heimamenn manni færri út leikinn en staðan var 1-1 eftir venjulegan leiktíma. Guðmundur Þórarinsson kom inná sem varamaður á 115. mínútu í framlengingu.

Ekkert var skorað í framlengingu og því vítaspyrnukeppni eina leiðin til að fá niðurstöðu í leikinn og þar var dramatíkin mögnuð. Bæði lið voru búin að taka þrjú víti og hafði New York klúðrað einni spyrnu.

Pedro Gallese, markvörður Orlando, varði fjórðu spyrnuna, en VAR skoðaði vítið og þar kom í ljós að Gallese færði sig af línunni og fékk hann rauða spjaldið í kjölfarið en þetta var önnur áminning hans í leiknum.

Þar kemur Rodrigo Schlegel, varnarmaður Orlando, inn í söguna en hann fór í markið. New York skoraði örugglega framhjá honum úr fjórðu spyrnunni og þá klúðraði Nani fjórðu spyrnu Orlando.

Útlitið ekki gott fyrir Orlando. Gummi Tóta var næstur á punktinn en Schlegel sá við honum. Markvarslan var ekkert svakalega falleg en dugði til því Orlando skoraði úr næsta víti og tryggði sig áfram.

Hægt er að sjá vörsluna hér fyrir neðan.