Þórður Þórðarson.
Þórður Þórðarson, þjálfari kvennaliðs ÍA, var nokkuð ánægður með frammistöðu sinna stúlkna þrátt fyrir 2-0 tap gegn Selfossi í Pepsi-deild kvenna í kvöld.
Lestu um leikinn: ÍA 0 - 2 Selfoss
„Mér fannst leikurinn ágætur hjá mínum stelpum. Við spiluðum fínt í fyrri hálfleik og spilum mjög vel fram að öðru markinu sem við fáum á okkur í seinni hálfleik. Við fórum að taka sénsa fram á við og það opnaðist aðeins hjá okkur en heilt yfir fannst mér stelpurnar standa sig vel," sagði Þórður við Fótbolta.net.
Leikurinn var spilaður í knattspyrnuhöllinni á Akranesi en ekki á sjálfum velli liðsins, en Þórður segir aðstæður ekki hafa boðið upp á annað.
„Ég held það hafi verið betra fyrir bæði lið. Völlurinn hjá okkur í dag er bara hávaðarok og skítur og það hefði ekki orðið neinn fótbolti. Ég held það sé bara best fyrir fótboltann að við höfum spilað inni."
Athugasemdir
