Deildin er búin í Katar en QFA bikarinn heldur áfram að rúlla. Íslendingalið Al Arabi átti í dag útileik gegn Al-Kharitiyath.
Landsliðsfyrirliðinn Aron Einar Gunnarsson var á sínum stað í byrjunarliði Al Arabi sem tókst að landa 2-0 sigri.
Það var hinn 27 ára gamli Mehrdad Mohammadi sem skoraði bæði mörk Al Arabi í leiknum; eitt í fyrri hálfleik og hitt í seinni hálfleiknum.
Það er leikið í riðlum í þessum bikar. Al Arabi tapaði fyrsta leiknum sínum gegn Al Shamal en tókst að vinna í dag og endar á toppi riðilsins. Al Arabi er því komið í átta-liða úrslitin.
Heimir Hallgrímsson er aðalþjálfari Al Arabi og í þjálfarateyminu eru Bjarki Már Ólafsson og Freyr Alexandersson.
Athugasemdir