Sjáðu draumamark Sigurðar Péturs á Grenivík - „Klárlega besta markið á ferlinum"

„Ég er ekki mikið fyrir að skora mörkin, held ég sé búinn að spila 124 leiki og þetta var fjórða markið. Ég fékk boltann út eftir hornspyrnu og setti hann bara innanfótar nánast upp í skeytin. Frábær tilfinning. Alveg klárlega besta markið á ferlinum, þetta leit vel út alveg frá upphafi," sagði Sigurður Pétur Stefánsson, fyrirliði Kormáks/Hvatar, við Fótbolta.net eftir 1-3 endurkomusigur sinna manna gegn Magna í 32-liða úrslitum Fótbolti.net bikarsins í kvöld. Hann var með leikja- og markatölfræðina alveg á hreinu, hárréttar tölur.

Sigurður Pétur skoraði annað mark gestanna með glæsilegu langskoti í seinni hálfleik. Markið má sjá í spilaranum hér að neðan. „Hvaða kjaftæði er þetta?" heyrist í útsendingu á Magni TV.

Dregið verður í 16-liða úrslitin í hádeginu á föstudag og vonast Sigurður eftir því að mæta nágrönnunum frá Sauðárkróki í næstu umferð. Viðtalið má sjá í spilaranum efst.