Viktor Örn Margeirsson.
Orri og Óskar Hrafn.
„Þetta er mjög svekkjandi. Mér fannst við mjög flottir heilt yfir en við erum hálfsofandi á tveimur augnablikum og lið með svona gæði refsa fyrir það," sagði Viktor Örn Margeirsson, varnarmaður Breiðabliks, eftir 0-2 tap gegn FC Kaupmannahöfn í forkeppni Meistaradeildarinnar.
„Það má ekkert út af bregða þegar við erum að spila á þessu getustigi, gæðin eru það mikil."
„Það má ekkert út af bregða þegar við erum að spila á þessu getustigi, gæðin eru það mikil."
Lestu um leikinn: Breiðablik 0 - 2 FCK
Breiðablik spilaði á löngum köflum mjög vel í leiknum en FCK fer með með 0-2 forystu í einvíginu.
„Mér fannst við standa vel í þeim og gott betur en það, að mörgu leyti fannst mér við betri. Hvað gerir útslagið? Sofandaháttur hjá okkur og við erum 'sloppy' í tveimur augnablikum og það er of mikið. Við höfum ekki efni á því í svona leikjum. Við verðum að nýta þá sénsa sem gefast líka. Maður finnur fyrir gæðunum þeirra en mér fannst við eiga helling í þá."
Blikar lentu undir eftir tæplega mínútu og það var högg. „Það var pirrandi en það er ekki hægt að breyta neinu. Við sópum ekki skipulagi okkar undir teppið þó við fáum á okkur eitt mark. Við höldum áfram en það er alltaf pirrandi að fá á sig mark, hvort sem það er eftir nokkrar sekúndur eða nokkrar mínútur."
Mér finnst hann helvíti góður
Orri Steinn Óskarsson, sonur Óskars Hrafn Þorvaldssonar, þjálfara Breiðabliks, kom inn á í seinni hálfleiknum. Hvernig var fyrir Viktor, miðvörð Breiðabliks, að kljást við Orra?
„Það var gaman. Mér finnst hann helvíti góður og hann á að fá góðan séns í þessu liði. Mér fannst gaman að eiga við hann, svolítið erfiður. En ég er að spila á móti framherja og það er sama hvert eftirnafnið á honum er, þá reyni ég að pakka honum saman."
Lengst af þá spilaði Jordan Larsson fremstur hjá FCK í kvöld, en hann er líka með áhugavert eftirnafn; hann er sonur sænsku goðsagnarinnar Henrik Larsson.
„Þetta eru synir tveggja stórstjarna," sagði Viktor léttur en hann hefur trú fyrir seinni leikinn á Parken í næstu viku.
„Ég persónulega fer ekki í neinn leik nema ég hafi trú á því að ég geti unnið hann. Við ætlum að fara þangað og reyna okkar besta til að sjokkera þá og vinna. Það verður erfitt að fara á Parken en þetta var líka erfitt í kvöld. Við ætlum að gefa allt í þetta, reyna að sjokkera þá og fara áfram í þessu einvígi. Það er ekki spurning."
Hægt er að sjá allt viðtalið í spilaranum hér fyrir ofan.
Athugasemdir
