Markvörðurinn Atli Gunnar Guðmundsson var varamarkvörður FH í æfingaleik gegn Leikni Reykjavík á laugardag.
FH vann 3-1 sigur á Leiknismönnum í æfingaleiknum sem fram fór í Breiðholti.
Atli Gunnar lék með Fjölni í Pepsi Max-deildinni síðasta sumar en hann verður ekki þar áfram. Atli sagði í samtali við Fótbolta.net að hann hefði tekið sér frí af persónulegum ástæðum.
Samkvæmt upplýsingum Fótbolta.net þá gæti Daði Freyr Arnarsson verið á leið frá FH. Hann gæti hugsanlega verið á leið í Lengjudeildina.
Gunnar Nielsen er aðalmarkvörður FH og Atli Gunnar gæti komið inn sem varamarkvörður hjá Fimleikafélaginu. Atli Gunnar er uppalinn hjá Hugin á Seyðisfirði og spilaði þar allt til ársins 2016. Þá gekk hann í raðir Fram og var þar í tvö tímabil. Svo fór hann í Fjölni þar sem hann spilaði síðastliðin tvö tímabil.
Hann hjálpaði liðinu að komast upp úr Lengjudeildinni og var hann aðalmarkvörðurinn í Grafarvoginum í Pepsi Max-deildinni síðasta sumar. Hann fékk á sig 39 mörk í þeim 17 leikjum sem hann spilaði er Fjölnir féll.
Athugasemdir