„Auðvitað svekktur að tapa, þetta var síðasta hálmstrá okkar að anda í hálsmálið á einhverjum. Fyrri hálfleikurinn fór með þetta í dag, vorum ekki líkir sjálfum okkur. Seinni hálfleikurinn allt annar en það er ekki nóg að spila bara annan hálfleikinn á fullu gasi. Eins og góður maður sagði þá fengum við það út úr þessum leik sem við lögðum í hann," sagði Páll Viðar Gíslason, þjálfari Þórs, eftir tap gegn Fram í dag.
Lestu um leikinn: Þór 0 - 2 Fram
Þórsarar léku á móti vindi í fyrri hálfeik. Völdu Þórsarar að byrja með vindi?
„Ég viðurkenni að ég hef ekki hugmynd hvort við áttum valið eða ekki. Síðustu tvo leiki höfum við byrjað á móti og það var ekki svoleiðis í dag, hvort sem við höfum valið það eða ekki. Það er ekki stóra ástæðan fyrir þessu við þurfum að spila bæði með og á móti vindi - við ættum að vera orðnir vanir því þar sem þetta var þriðji [vindasami] leikurinn í röð. Við vorum mjög máttlausir með vindinn í bakið í dag. Við rendum að skapa alvöru færi á móti strekkingnum en það tókst ekki. Sanngjarn Framsigur bara."
Framarar skora fyrra markið snemma leiks eftir að hafa verið fljótir að taka innkast hátt uppi á vellinum. Var Palli ósáttur með varnarleikinn í því marki?
„Þetta er eins og í 5. flokki, það talar enginn saman. Það er innkast og hann sendir á frían mann sem labbar nánast inn í manninn og sendir á einn mann sem er umkringdur fimm Þórsurum. Þetta er saga okkar í fyrri hálfleik þar sem við vorum hálf sofandi. Ég þekkti ekki mína menn miðað við hvað maður veit að þeir geta. Að fá svona mark á sig vegna sofandaháttar er stunga í hjarta."
Palli ræðir að lokum um framhaldið, heimavallarárangur, meiðsli leikmanna. Hann segir að Emanuel Nikpalj hafi fengið niðurstöðu úr myndatökum fyrir skemmstu og krossböndin hangi saman á lyginni einni saman. Emy meiddist í leiknum gegn Aftureldingu fyrr í þessum mánuði.
Viðtalið í heild sinni má sjá í spilaranum hér að ofan.
Athugasemdir