Kristján Guðmundsson þjálfari ÍBV segir það ekki hafa verið óska byrjun að tapa með þremur mörkum í 1. umferðinni gegn Breiðablik í dag, 4-1.
Lestu um leikinn: Breiðablik 4 - 1 ÍBV
„Við byrjum leikinn vel en endum hann mjög illa,” sagði Kristján en í stöðunni 2-1 fyrir Breiðablik þá ákveður hann að setja meiri sóknarþunga í liðið með það að markmiði að ná að jafna metin.
Það gekk ekki betur en svo að í kjölfarið skoruðu Breiðablik tvö mörk í viðbót.
„Við prófuðum að opna leikinn og spila með fleiri framherja en réðum ekkert við það og liðið galopnaðist. Við réðum ekkert við það að fara aðeins djarfara inn í leikinn til að jafna og í staðin töpuðum við stærra. Það var áhætta sem við tókum og það verður að hafa það.”
Kristján var ósáttur með hversu margir leikmenn liðsins voru að spila undir getu.
„Seinni hálfleikurinn var alveg afleitur. Ef ég lít heilt yfir leikinn þá voru of margir leikmenn í liðinu að spila illa. Það geta ekki svona margir leikmenn spilað illa í einum leik, það er ekkert lið sem þolir það eins og kom í ljós.”
Kristján staðfesti að varnarmaðurinn David Atkinson sem spilaði með ÍBV seinni hluta síðasta sumars væri á leiðinni aftur í ÍBV.
En eru fleiri leikmenn á leiðinni?
„ Ég veit það nú ekki, en ef þú horfir á frammistöðuna í leiknum þá veitir kannski ekkert að því,” sagði Kristján að lokum og glotti.
Viðtalið í heild sinni má sjá í sjónvarpinu hér að ofan.
Athugasemdir
