Miðvörðurinn öflugi Damir Muminovic er kominn aftur til Íslands þar sem hann hefur samið við Grindavík í Lengjudeildinni.
Damir er 35 ára gamall og snýr aftur til landsins eftir eitt ár í malasísku deildinni með DPMM frá Brúneí.
Þar áður var hann mikilvægur hlekkur í sterku liði Breiðabliks í tíu ár, eftir að hafa alist upp hjá HK.
28.11.2025 16:57
Damir og Hjörvar í Grindavík (Staðfest)
„Ég er virkilega ánægður með ákvörðunina sem ég tók, bæði fyrir sjálfan mig og fyrir klúbbinn," sagði Damir í viðtali við Fótbolta.net eftir undirskriftina. Hann gat valið á milli nokkurra félaga og segir að það hafi verið auðvelt að velja Grindavík.
„Klúbburinn seldi mér hugmyndina af verkefninu hérna sem hentar mér mjög vel og er virkilega spennandi."
Grindavík æfir í Reykjavík þessa dagana en markmiðið er að æfa og spila í Grindavík.
Damir verður í leiðtogahlutverki hjá ungu liði Grindvíkinga en hann er samningsbundinn Breiðabliki út árið og mun skipta um félag eftir áramót.
„Maður er alltaf með sín persónulegu markmið en klúbburinn er með það markmið að koma sér aftur á rétta braut og fá fólkið hérna í bænum með sér í lið. Ég deili þessu markmiði með klúbbnum."
Athugasemdir
