FC Kaupmannahöfn hefur hafnað tveimur tilboðum frá RB Salzburg í hinn öfluga Hákon Arnar Haraldsson.
Arnar Laufdal Arnarsson greinir frá þessu og segir að fyrra tilboðið hafi hljóðað upp á 8 milljónir evra og það seinna 10 milljónir. Í báðum tilboðunum voru 2 milljónir árangurstengdar. Fjallað hefur verið um tilboð sem átti að hafa hljóðað upp á 13 milljónir evra en Arnar segir að tilboðin sem hafi borist hafi ekki verið svo há.
Hákon Arnar er ekki nema 19 ára gamall en hefur nú þegar spilað 40 keppnisleiki fyrir Kaupmannahöfn. Í þeim hefur hann skorað 6 mörk og gefið 5 stoðsendingar.
Salzburg er sterkasta félagið frá Austurríki og þekkt í fótboltaheiminum fyrir að vera með gríðarlega öflugt njósnarakerfi og fyrir að gefa ungum leikmönnum tækifæri.
Ungir leikmenn vilja spila fyrir Salzburg því þar fá þeir tækifæri. Leikmenn á borð við Sadio Mane og Erling Braut Haaland spiluðu fyrir félagið og brutust fram í sviðsljósið, rétt eins og Karim Adeyemi, Dominik Szoboszlai, Konrad Laimer og margir aðrir.
Nóg að gera! Skv. heimildum hefur FCK hafnað tveimur tilboðum í Hákon frá Salzburg. Fyrra var 6m€+2m€ og seinna var 8m€+2m€???? Guarenteed greiðslur sirka helmingi lægra en slúðrið segir til um.Þetta 13,5m€ var víst ekki rétt enda væri þetta í Top5 yfir record transfer hjá FCK pic.twitter.com/jceu0WsFUW
— Arnar Laufdal (@AddiLauf) January 29, 2023
