Ólafur þjálfaði Stjörnuna í fyrra og var þar áður þjálfari Vals. Hann gerði Val tvisvar að Íslandsmeisturum og tvisvar að bikarmeisturum.

Hjá Val var hann lengi vel með Anton Ara Einarsson, núverandi markvörð Breiðabliks, í markinu. Hann segir að Anton sé frábær markvörður, inn í teignum - ekki fyrir utan hann. Í fyrra var Anton mikið að koma út úr teig fyrir uppspil Blika og gerði hann nokkur mistök í kjölfarið á því.

„Það er gríðarlega mikilvægt fyrir þá - ef þeir ætla sér að vinna þetta mót - að hann nái sér á strik og verði frábær í sumar," sagði Jón Þór Hauksson um Anton.

„Ég þekki Anton Ara mjög vel og hann er frábær markvörður, þegar hann spilar inn í vítateignum sínum. Hann er ekkert sérstakur þegar hann er að spila út á miðjum velli sem hann gerir oftar en ekki hjá Breiðablik," sagði Óli.

„Við erum að tala um hann sem lykilmann og þá erum við að meina inn í vítateignum. Ef markvörðurinn þinn er með boltann lungann af leikjum þá held ég að liðið þitt sé ekki merkilegt. Ég vil meina að hann sé geggjaður markvörður og á bara að vera í markinu."

Breiðablik er spáð mjög góðu gengi í sumar, því er spáð að Blikarnir berjist um Íslandsmeistaratitilinn við Val.