Sterkastur í 16. umferð - Bestu kaupin í deildinni

Valur trónir á toppi Bestu deildarinnar og bikarúrslitaleikur gegn Vestra er framundan í dagskránni. Óhætt er að segja að Hlíðarendapiltar séu á flugi en þar á markvörðurinn Frederik Schram gríðarlega mikið hrós skilið.

Hann hefur tekið rosalega mikilvægar markvörslur á stórum tímapunktum og rætt var um það í Innkastinu að hann væri á leið með að vera bestu kaup tímabilsins í Bestu deildinni.

Frederik Schram er leikmaður 16. umferðar eftir að Valur vann 3-1 sigur gegn FH.

„Schram var einfaldlega stórkostlegur í dag. Eitt skipti sem hann tók tvöfalda vörslu, og alveg 2-3 vörslur í viðbót sem voru á einhverjum öðrum klassa en við erum vön að sjá á Íslandi," skrifaði Haraldur Örn Haraldsson í skýrslu um leikinn.

„Frederik Schram var frábær í að hjálpa okkur í gegnum erfiða kafla þar sem FH-ingar voru að vaða í færum. Á endanum bara gríðarlega mikilvæg þrjú stig fyrir okkur," sagði Túfa, þjálfari Vals, eftir leikinn.