Arnar Gunnlaugsson með verðlaunagripinn eftir leik í kvöld.
Úr leik Víkings og Vals.
Íslands- og bikarmeistarar Víkings eru meistarar meistaranna eftir sigur á Val í vítaspyrnukeppni. Þessi árlegi leikur markar upphaf fótboltatímabilsins og var áhorfendum í Fossvoginum í kvöld boðið upp á mikla skemmtun og fínan fótbolta.
Lestu um leikinn: Víkingur R. 5 - 3 Valur
„Mér fannst þetta frábær leikur. Það voru mikil gæði í fyrri hálfleiknum miðað við aðstæður. Það var vindasamt og kalt en bæði lið sýndu mjög flott tilþrif," segir Arnar Gunnlaugsson þjálfari Víkings í viðtali við Sölva Haraldsson, fréttamann Fótbolta.net
Arnar segir að það hafi verið ótrúlegt að Víkingur hafi á kafla í seinni hálfleik ekki náð að koma sér í forystu í leiknum.
„Eftir að Halli var rekinn út af fékk Valur að snerta boltann meira en sköpuðu sér lítið. Það var karakter og gott hjarta sem tryggði okkur í vítakeppnina."
Fannst honum rétt að Halldór Smári fékk að líta rauða spjaldið?
„Því miður virkaði það þannig. Þetta virkaði groddaralegt hjá Halla mínum. Hann var búinn að vera vel aggressívur í leiknum. Ég á eftir að sjá þetta aftur en miðað við fyrstu sýn virtist hann ekki geta gert annað en gefa honum rautt spjald."
„Það var enginn æfingaleikjafílingur, þetta var bara alvöru leikur og bæði lið lögðu líf og sál í þetta og mikil gæði í báðum liðum. Ef þetta er það sem koma skal í sumar verður þessi deild algjör veisla."
Augu margra beindust að sjálfsögðu að Gylfa Sigurðssyni leikmanni Vals.
„Hann sýndi sín gæði inn á milli og verður frábær fyrir Val í sumar. Það er gott fyrir strákana sem spila á móti honum, það er smá extra að spila á móti svona miklum meistara."
Arnar segist finna mikla spennu fyrir Bestu deildinni og hann býst við góðri mætingu í stúkuna en það var vel mætt í stúkuna í kvöld.
„Ég held persónulega að mótið verði ekki eins og síðustu tvö ár þar sem eitt lið er búið að stinga af. Ég held að þetta verði miklu jafnara í ár. Það lið sem ætlar að taka titilinn af okkur þarf að eiga stjörnusumar."
Það eru nokkur stór nöfn á meiðslalistanum hjá Víkingi. Arnar Gunnlaugsson segist vonast til þess að Jón Guðni Fjóluson verði byrjaður að spila á fullu um miðjan maí en engin tímapressa sé á honum. Hann segir styttra í aðra leikmenn sem eru á meiðslalistanum.
Hægt er að sjá viðtalið í heild sinni í sjónvarpinu hér að ofan.
Athugasemdir
