England: West Ham sigraði Chelsea í fjörugum leik

Fyrsta tap Chelsea síðan í febrúar kom í dag er liðið heimsótti West Ham United í nágrannaslag á London Stadium.

Mark Tomas Soucek var dæmt af vegna rangstöðu og komust lærisveinar Frank Lampard yfir þegar Willian skoraði úr vítaspyrnu á 42. mínútu. Mateo Kovacic var felldur innan teigs.

Soucek jafnaði skömmu síðar með skallamarki eftir hornspyrnu en hægt er að setja stórt spurningarmerki við úthlaup Kepa Arrizabalaga af marklínu Chelsea.

Staðan var jöfn í leikhlé og kom Michail Antonio heimamönnum yfir í upphafi síðari háflleiks. Jarrod Bowen lagði fyrstu tvö mörkin upp.

Lampard gerði þrjár breytingar og jafnaði Willian leikinn með glæsilegu marki beint úr aukaspyrnu á 72. mínútu. Spyrnan var nokkuð langt frá marki og skaut brasilíski snillingurinn boltanum í stöngina og inn.

Chelsea reyndi að ná í sigurinn á lokamínútunum en þá komust Hamrarnir í skyndisókn sem endaði með því að hinn ferski Andriy Yarmolenko, sem kom inn tíu mínútum fyrr, gerði sigurmarkið.

Meira var ekki skorað og er þetta afar mikilvægur sigur fyrir West Ham sem er núna þremur stigum fyrir ofan fallsæti.

Þetta eru einnig afar jákvæð tíðindi fyrir lið á borð við Leicester, Manchester United og Wolves sem vilja öll spila í Meistaradeildinni.

Chelsea er áfram í fjórða sæti, en aðeins tveimur stigum fyrir ofan Man Utd og Wolves.