OGC Nice er búið að staðfesta komu Aaron Ramsey til félagsins á frjálsri sölu eftir að hann samdi um starfslok við Juventus.
Ramsey, 31 árs, skipti frá Arsenal til Juve á frjálsri sölu sumarið 2019 og fékk risasamning á Ítalíu en stóðst engan veginn væntingarnar sem voru til hans gerðar.
Talið er að miðjumaðurinn sóknarsinnaði sé búinn að skrifa undir tveggja ára samning við franska félagið sem endaði í fimmta sæti deildarinnar á síðustu leiktíð.
Nice missti þjálfarann Christophe Galtier til PSG í sumar en er búið að ráða Lucien Favre, fyrrum þjálfara Borussia Dortmund, í hans stað og kaupa nokkra leikmenn.
Ramsey skoraði 6 mörk og átti 6 stoðsendingar í 70 leikjum hjá Juve. Til samanburðar skoraði hann 65 mörk og gaf 65 stoðsendingar í 371 leik með Arsenal.