Sóknarmaðurinn Folarin Balogun er núna markahæsti leikmaðurinn í frönsku úrvalsdeildinni.
Hann skoraði þrennu í gær er Reims vann mjög svo góðan 4-2 sigur gegn Lorient á heimavelli sínum. Reims lenti 0-2 undir í leiknum en tókst svo að snúa taflinu við með Balogun fremstan í flokki.
Balogun, sem er á láni hjá Reims frá Arsenal, er núna búinn að gera 14 mörk í 20 deildarleikjum fyrir Reims á þessari leiktíð.
Hann er núna búinn að taka fram úr leikmönnum á borð við Kylian Mbappe og Neymar í baráttunni um markakóngstitilinn í Frakklandi. Hann trónir nú á toppnum á þeim lista en Mbappe er með 13 mörk og Neymar er með 12.
Þessi efnilegi leikmaður er fæddur í New York í Bandaríkjunum en flutti ungur að árum til Englands. Hann kom fyrst í akademíu Arsenal þegar hann var átta ára gamall.
Athugasemdir
