Lét ljós sitt skína undir stjórn Hernan Crespo
Enzo átti alltaf að vera fótboltamaður. Pabbi hans elskar íþróttina og skýrði son sinn í höfuðið Enzo Francescoli sem er einn besti fótboltamaður í sögu Úrúgvæ.

Þegar Enzo Fernandez var fimm ára var hann þegar á mála hjá River Plate. Hann fór í gegnum yngri flokka félagsins og skrifaði undir sinn fyrsta atvinnumannasamning 2019, þegar hann var 18 ára gamall.

Hann var lánaður til Defensa y Justicia þar sem hann fékk reynslu í aðalliðsfótbolta undir stjórn Hernan Crespo, fyrrum leikmanns Chelsea. Eftir endurkomuna til River Plate lék hann aðeins 40 leiki áður en hann var seldur til Benfica síðasta sumar.

Á þessum tímapunkti hafi Enzo ekki spilað landsleik og fylgdist með heima þegar Lionel Messi og félagar unnu Copa America. Í september síðastliðnum lék Enzo svo fyrsta landsleikinn sinn en hann átti góða innkomu í 3-0 sigri gegn Hondúras í vináttulandsleik.

Frá byrjun var Enzo á skotskónum með Benfica og skoraði strax í fysta leik, gegn Midtjylland í undankeppni Meistaradeildarinnar.

Byrjaði á bekknum á HM
Enzo byrjaði á bekknum á HM, í 2-1 tapi gegn Sádi-Arabíu í fyrsta leik. En hann átti öfluga innkomu af bekknum og skoraði gegn Mexíkó í 2-0 sigri í næsta leik. Hans fyrsta landsliðsmark. Sú frammistaða gaf honum byrjunarliðssæti sem hann lét svo ekki af hendi á mótinu.

Argentína varð heimsmeistari í fyrsta sinn síðan 1986 og Enzo hefur verið að fagna nánast samfleytt síðan bikarinn fór á loft. Chelsea vonast til að fá ferskleika og sköpunarmátt á miðsvæðið með því að kaupa Enzo til félagsins.

Utan vallar er Enzo enn með æskuástinni en hann og Valentina Cervantes byrjuðu að hittast 2018 og eiga í dag unga stúlku saman.

Hann hefur aðeins spilað 14 leiki fyrir Benfica en allt stefnir í að hann reynist gullnáma fyrir félagið á ótrúlega skömmum tíma.