UTAN VALLAR: Tekjur KSÍ námu 2,3 milljörðum króna á síðasta ári

Greinin var einnig birt á utanvallar.is

KSÍ velti 2.349 milljónum króna á síðasta ári en áætlanir KSÍ fyrir árið 2025 gerðu ráð fyrir 2.070 milljónum króna í rekstrartekjur. Árið áður, 2024, voru rekstrartekjur KSÍ 2.023 milljónir króna og því jukust rekstrartekjur um 326 milljónir á milli ára, tæplega 16,1% aukning. Stærsti hluta rekstrartekna KSÍ koma frá styrkjum og framlögum eða tæplega 63,9%. Þar á eftir er sjónvarpsréttur næststærsti tekjuliðurinn en hlutfall hans af rekstrartekjum KSÍ er 18,7%.

Tekjuliðurinn Styrkir og framlög er sundurliðaður í skýringum ársreikningsins og þar má sjá að stærsti hluti þeirra tekna koma frá UEFA, rúmlega 58%. Þar á eftir eru framlög frá FIFA 22% af þessum tekjulið. Heilt yfir þá er 37% af rekstrartekjum KSÍ tilkomnar vegna framlags frá UEFA og 14% af rekstrartekjunum eru tilkomnar vegna framlags frá FIFA.

Í greinargerð sem KSÍ birti með ársreikningnum kemur fram að framlagið frá UEFA var 27% hærra en áætlanir gerðu ráð fyrir vegna þess að A-landslið kvenna komst á EM kvenna. 

Þess ber að nefna að ýmis framlög frá UEFA og FIFA eru áætluð í ákveðin verkefni, og því ekki um frjáls framlög sem KSÍ getur ráðstafað að eigin vild. Í greinargerð ársreikningsins er meðal annars tekið fram að KSÍ fékk 62,6 milljón króna styrk frá FIFA sem var einungis ætlaður til notkunar á vísinda- og þróunarsviði KSÍ (e. Technical Development Scheme)

Undir tekjuliðnum Styrkir og framlög má einnig finna undirlið sem heitir Ýmsir styrkir, en samkvæmt greinargerðinni eru meðal annars samningar við innlenda samstarfsaðila og PUMA. Tekjurnar af þessum undirlið námu 195 milljónum króna á síðasta ári.

Tekjur KSÍ af landsleikjum lækkuðu um tæplega 5,2 milljónir króna á milli ára og námu 149 milljónum króna árið 2025. Samkvæmt greinargerðinni eru þessar tekjur tilkomnar vegna miðasölu af heimaleikjum landsliða Íslands (A karla, A kvenna og U21 karla) og tekjum vegna landsleikja erlendis. Í greinargerðinni segir að miðasala á A landsleiki karla jukust á milli ára en að tekjur vegna miðasölu á A landslið kvenna voru lægri en áætlað var sökum þess að þær þurftu að spila þrjá leiki á heimavelli Þróttar þegar framkvæmdir stóðu yfir á Laugardalsvelli.

Tekjur KSÍ vegna sjónvarpsrétts voru 438 milljónir króna á síðasta ári en þessar tekjur lækkuðu um tæplega 10,9 milljónir króna á milli ára. Þessi tekjuliður er 18,7% af rekstrartekjum KSÍ. Knattspyrnusambandið hefur framselt þennan sjónvarpsrétt til UEFA þar sem hann er seldur sem hluti af stærri pakka (UEFA Centralization of Rights). Núverandi samningur við UEFA gildir frá júlí 2022 til júní 2028 og fær KSÍ 17 milljónir evra, ríflega 2.467 milljónir evra á núverandi gengi, fyrir tímabilið. Í greinargerðinni segir að bróðurpartur sjónvarpstekna KSÍ megi rekja til A landsliðs karla, tæplega 418 milljónir af þeim 438 milljónum króna sem KSÍ fékk á síðasta ári.

Aðrar rekstrartekjur KSÍ voru 164 milljónir króna á síðasta ári en þessi tekjuliður jókst um 42 milljónir króna á milli ára, sem er aukning upp á 34,7%. Árið 2021 voru þessar tekjur 69 milljónir króna og hefur þessi tekjuliður því vaxið um 137,2% frá árinu 2021. Á síðasta ári voru aðrar rekstrartekjur 7,0% af rekstrartekjum KSÍ.

Rekstrartekjur Laugardalsvallar voru 96 milljónir króna á síðasta ári og hækkuðu um tæplega 15,6 milljónir króna á milli ára en það er aukning upp á 19,3%. Í greinargerðinni segir að þessar tekjur samanstanda af rekstrarframlagi frá Reykjavíkurborg, vallarleigu, tekjum vegna veitingasölu og öðrum viðburðum. Rekstrartekjur Laugardalsvallar voru hærri en áætlað var, aðallega vegna leikja Breiðabliks í Sambandsdeildinni.