Darwin Nunez var hetja Liverpool í vægast sagt dramatískum sigri gegn Nottingham Forest í gær.
Það hafa verið högg skorin í leikmannahóp Liverpool að undanförnu en Darwin Nunez og Dominik Szoboszlai voru komnir á varamannabekkinn í gær eftir að hafa jafnað sig af meiðslum.
Liðið átti erfitt uppdráttar í gær en Nunez kom inn með mikla orku og það skilaði sér á níundu mínútu uppbótatímans þegar hann skallaði boltann í netið eftir fyrirgjöf frá Alexis Mac Allister.
Luis Suarez, landi Nunez og fyrrum leikmaður Liverpool spilar í dag með Inter Miami en hann talaði um landa sinn eftir 5-0 sigur Inter Miami gegn Orlando City í MLS deildinni í nótt.
„Ég sá leikinn. Ég er svo ánægður fyrir hönd Liverpool og Darwin. Hann er einn besti framherji í heimi í dag," sagði Suarez.
