Það komu nokkrir Íslendingar við sögu í keppnisleikjum kvöldsins og lagði Logi Tómasson upp í tyrknesku deildinni.
Samsunspor vann á útivelli gegn Eyupspor og lék Logi allan leikinn í vinstri bakvarðarstöðunni. Hann er núna búinn að skora einu sinni og gefa tvær stoðsendingar í síðustu fjórum deildarleikjum.
Samsunspor siglir lygnan sjó í efri hluta deildarinnar, með 39 stig eftir 29 umferðir.
Óttar Magnús Karlsson var þá í byrjunarliði ítalska liðsins Renate og skoraði í naumum sigri gegn Pro Vercelli. Renate er í harðri baráttu um sæti í Serie B á næstu leiktíð, liðið er með 60 stig eftir 36 umferðir í C-deildinni.
Óttar er með 10 mörk í 29 leikjum í C-deildinni á leiktíðinni.
Á sama tíma fékk Sveinn Aron Guðjohnsen að spila síðustu mínúturnar í sigri Cavese sem er núna fjórum stigum frá fallsæti í C-deildinni.
Í efstu deild í Danmörku lék Daníel Freyr Kristjánsson fyrstu 78 mínúturnar í fjögurra marka jafntefli hjá Fredericia gegn Vejle. Fredericia er tveimur stigum frá fallsæti þegar sex umferðir eru eftir.
Að lokum var Hlynur Freyr Karlsson ónotaður varamaður í 2-2 jafntefli hjá Brommapojkarna gegn AIK í efstu deild í Svíþjóð. Brommapojkarna er með tvö stig eftir tvær umferðir.
Renate 2 - 1 Pro Vercelli
1-0 Óttar Magnús Karlsson ('15)
2-0 M. Cali ('64)
2-1 A. Sow ('79)
Eyupspor 1 - 2 Samsunspor
Benevento 0 - 1 Cavese
Fredericia 2 - 2 Vejle
Brommapojkarna 2 - 2 AIK
