Dagný Brynjarsdóttir gerði tvö mörk þegar Ísland vann 6-0 sigur gegn Hvíta-Rússlandi síðasta föstudagskvöld.
Dagný er þar með orðin næst markahæst í sögu íslenska landsliðsins með 37 mörk - eins og Hólmfríður Magnúsdóttir.
Landsliðsfyrirliðinn Sara Björk Gunnarsdóttir hefur lengi spilað með Dagnýju í landsliðinu, en undirritaður spurði Söru út í kollega sinn á miðjunni á fréttamannafundi í dag.
„Eftir öll þessi ár? Dagný er sérstök og skemmtileg týpa. Hún er frábær leikmaður og frábært að spila með henni," sagði Sara.
„Það er mikil reynsla í henni og yfirvegun. Hún hefur verið að spila djúp á miðjunni og er búin að leysa þá stöðu ótrúlega vel, búin að spila hana vel. Hún er frábær leikmaður, gott að spila með henni og mjög góður liðsfélagi."
Dagný og Sara koma báðar til með að byrja á morgun þegar íslenska liðið spilar einn sinn mikilvægasta leik í sögunni. Ísland mætir Hollandi í hreinum úrslitaleik um beint sæti á HM sem fer fram í Ástralíu og Nýja-Sjálandi á næsta ári.
Athugasemdir