Dragan Stojanovic þjálfari Dalvíkur/Reynis var svekktur með úrslit dagsins eftir að liðið hans tapaði 4-3 gegn Aftureldingu.
Lestu um leikinn: Afturelding 4 - 3 Dalvík/Reynir
„Ég er mjög sár að fá á okkur svona mark í lokin. Strákarnir voru búnir að vera berjast og spila þokkalega en já mjög súrt að fá á sig svona mark í endan."
Dalvíkingar lágu neðarlega á vellinum mest allan leikinn og þurftu að verjast sóknarleik Aftureldingar lengi. Vörnin hélt lengi en á endanum brast hún og liðið fær á sig 4 mörk.
„Við vitum það að Afturelding er með mjög gott lið og með mikinn hraða framarlega. Við viljum ekki búa til stórt svæði fyrir aftan öftustu línu okkar þannig að við dettum niður, verjumst vel og sækjum hratt. Fyrstu svona 20 mínúturnar voru Afturelding miklu betri skutu í slánna einu sinni eða tvisvar. Þeir voru miklu meira með boltan og svoleiðis. Við gerum svo miklu betur í seinni hálfleik og við gátum alveg stolið stigi hér í dag"
Snemma í fyrri hálfleik fær Nikola Kristinn Stojanovic leikmaður Dalvíkur og sonur Dragans högg á hausinn. Hann þarf að vera borinn út af í börum og það endaði með að sjúkrabíll sótti hann til að fara með hann upp á sjúkrahús.
„Það var mjög leiðinlegt atvik, snemma í leiknum. Þeir skalla saman hann og Aron. Hann er kominn upp á spítala og síðustu fréttir sem ég fékk áðan er að það er búið að sauma hann og hann liggur bara upp á spítala. Ég veit ekki meir"
Dalvíkur liðið hefur komið flestum töluvert á óvart. Flest allir miðlar spáðu þeim í lang neðsta sæti deildarinnar fyrir mót en sagan í sumar hefur ekki verið þannig. Þeir hafa náð í 6 stig í sínum leikjum og fyrir utan 3-0 tap gegn Njarðvík þá hefur liðið verið inn í öllum leikjum sem þeir hafa spilað hingað til.
„Ég veit ekki hvort menn hafi verið að vanmeta okkur eða ekki. Þegar það var verið að spá okkur 12. sæti þá myndi ég segja að það hafi verið bara rétt, miðað við lengjubikars leikina og æfingaleiki. Við vorum með lítinn hóp á þessum tíma, svo bætum við okkar hóp í Apríl. Það komu 2-3 útlendingar inn sem hafa ekki spilað neitt eða mjög lítið í Lengjudeildinni. Þeir breyta okkar liði, svo eru okkar ungu og efnilegu heimamenn. Það eru strákar sem eru búnir að stíga upp og eins og þú segir þá gáfum við Aftureldingu góðan leik í dag. Ég er stoltur af strákunum hvernig þeir spiluðu í dag. En mjög súrt og sárt þegar maður tapar. Svo má ekki gleyma að tveir strákar, mjög sterkir leikmennn eru heima í meiðslum sem eru báðir miðjumenn og eins og ég sagði áðan þá fer Nikola út af snemma. En á endanum er ég mjög ósáttur við þetta tap en mjög sáttur við hvernig við spilum þennan leik í dag."
Viðtalið má sjá í heild sinni í spilaranum fyrir ofan.
