Sigurvin Ólafsson þjálfari KV var kampakátur eftir dramatískan sigur á Aftureldingu. Leikurinn endaði 2-1 og sigurmarkið kom á 90. mínútu.
Lestu um leikinn: KV 2 - 1 Afturelding
„Ég er auðvitað alveg í skýjunum sérstaklega þar sem þú ert að tala við mig bara hérna 5 mínútum eftir leik þannig ég er ennþá bara með gæsahúð."
Frammistaða liðsins var kaflaskipt í leiknum en sigur hlýtur að teljast fín frammistaða.
„Já það má svo sem alveg deila um gæðin hjá okkur í dag. Það sást svolítið á okkar leik í dag að við hefðum verið stigalausir fram að þessum leik þannig sjálfstraustið var ekkert upp á marga fiska. Ég hefði viljað sjá okkur spila miklu betur við erum einum fleirri í lengri tíma en þegar 3 stig eru komin í pokann þá breytist allt.
Frammistaða KV hefur ekki verið slæm á tímabilinu þó þetta séu fyrstu 3 stig liðsins en lukkan datt þá loksins í dag.
„Já það má eiginlega segja það. Við erum búnir að klikka sjálfir á tveimur vítum í þessum fyrstu leikjum og verið óheppnir að mörgu leiti en í dag snýst þetta okkur í vil. Við skorum á síðustu mínútunni og við verjum víti. Það er bara karma þetta skilar sér allt."
Elmar Kári fékk rautt spjald eftir 30 mínútna leik. Sigurvin sjálfur var mjög nálægt og var sammála dómnum.
„Já ég held þetta hafi bara verið rétt dæmt. En ég finn alveg aðeins til með leikmanninum sem að framkvæmdi brotið, ég held að þetta hafi ekki verið neinn illur vilji. Þetta var bara mjög groddaralegt og í nútíma fótbolta er þetta rautt en gamli Venni hefði aldrei beðið um meira en gult fyrir þetta."
Viðtalið má sjá í heild sinni í spilaranum hér fyrir ofan.
