Sheffield heimsótti Luton í fallbaráttuslag í gær og vann 1-3 á útivelli. Þetta var aðeins þriðji sigur Sheffield á deildartímabilinu og er liðið komið með 13 stig eftir 24 umferðir.

Sheffield tapaði 0-5 gegn Aston Villa á heimavelli í síðustu umferð og voru leikmenn liðsins staðráðnir í að bæta upp fyrir þá frammistöðu.

„Strákarnir brugðust mjög vel við tapinu um síðustu helgi og verðskulduðu þennan sigur til fulls. Við brugðumst stuðningsmönnum fyrir viku síðan, við erum í ensku úrvalsdeildinni og það má aldrei gefa tommu eftir í þessari deild," sagði Wilder.

„Við gerðum vel að svara fyrir okkur, við erum komnir með fyrsta útisigurinn þó það hafi tekið langan tíma. Núna þurfum við að halda áfram og taka einn leik í einu. Ég get ekki ímyndað mér hvernig stöðutaflan mun líta út í enda tímabilsins. Við þurfum að gera okkar besta til að safna eins mikið af stigum og hægt er."