„Bara geggjað. Þetta byrjaði hægt en þegar við fundum taktinn og grasið þá byrjaði þetta að malla vel.“ sagði Viktor Jónsson, framherji og fyrirliði Skagamanna, eftir 3-0 sigur á Vestra í dag.
Lestu um leikinn: ÍA 3 - 0 Vestri
Viktor braut ísinn í fyrri hálfleik eftir fyrirgjöf frá Jóni Gísla.
„Við spilum okkur vel upp kantinn hægra meginn og Jón Gísli kemur með geggjaða fyrirgjöf milli markvarðar og varnarmannsins. Ég næ að koma fætinum í hann. Það eina sem ég hugsa í svona færum er að ég verð að koma honum á markið. Sérstaklega ef völlurinn er svona og boltinn skopptar bara eitthvað.“
Leikurinn í dag var fyrsti leikur ársins á Akranesvellinum. Grasið var ekkert sérstakt en Viktor segir það hafa verið gott miðað við árstíma.
„Það hefur oft verið betra. En hann er bara frábær miðað við árstíma. Hann er blautur og þungur. Þetta var alveg erfitt í dag en bara frábært að vera komið á grasið. Þetta verður bara betra.“
Viktor Jónsson fékk fyrirliðabandið í dag en hann segir að það séu margir sterkir og góðir karakterar í þessu Skagaliði.
„Bara gaman að vera fyrirliði. Bandið og ekki bandið, það eru margir stórir og sterkir karakterar í þessu liði og það kemur bara allt saman sem ein heild. Gaman.“
Viktor hefur byrjað mótið frábærlega og er kominn með 6 mörk í fyrstu 6 leikjunum.
„Ég er mjög ánægður með byrjunina hjá mér persónulega á mótinu. 6 mörk komin. Auðvitað eru einhver færi sem ég hefði viljað nýta en ég get ekki kvartað.“ sagði Viktor Jónsson, framherji, markaskorari og fyrirliði Skagamanna í dag.
Viðtalið við Viktor má sjá í heild sinni í spilaranum hér að ofan.
