Lið vikunnar í enska - Onana, Bruno og Salah

Markvörður: Andre Onana (Manchester United) - Átti mikilvægar vörslur þó fólk segi að þetta hafi 'bara verið gegn Leicester'. United vann öflugan 3-0 sigur í síðasta leiknum undir stjórn bráðabirgðastjórans Ruud van Nistelrooy.

Varnarmaður: Noussair Mazraoui (Manchester United) - Dalot var í vandræðum, Mazraoui var þá færður í hans bakvörð og lokaði á hættuna.

Varnarmaður: Craig Dawson (Wolves) - Úlfarnir unnu sinn fyrsta leik þegar þeir lögðu Southampton. Dawson var geggjaður í vörninni, átti ekki í nokkrum vandræðum með sóknarmenn Dýrlingana.

Varnarmaður: Dan Burn (Newcastle) - Tveir miðverðir af gamla skólanum í liði vikunnar. Burn hélt Chris Wood, sjóðheitum sóknarmanni Nottingham Forest, algjörlega í skefjum. Newcastle fagnaði sigri og Wood átti bara eina snertingu á boltann í vítateig Newcastle.

Varnarmaður: Pervis Estupinan (Brighton) - Hrikalega öflugur í sigri Brighton gegn Manchester City, bæði varnar- og sóknarlega.

Miðjumaður: Bruno Fernandes (Manchester United) - Portúgalski fyrirliðinn stígur upp þegar á þarf að halda. Kom United yfir gegn Leicester og alveg hægt að segja að hann hafi líka skorað annað mark leiksins þó það skráist sem sjálfsmark. Leiðtogi.

Miðjumaður: Joelinton (Newcastle) - Það vill gleymast að þessi stóri og stæðilegi leikmaður kom upphaflega sem sóknarmaður. Er að verða betri og betri sem miðjumaður og skoraði gegn Forest.

Sóknarmaður: Mohamed Salah (Liverpool) - Algjörlega stórkostlegur, enn og aftur. Skoraði og lagði upp gegn Aston Villa.

Sóknarmaður: Matheus Cunha (Wolves) - Langbesti maður vallarsins, skoraði og lagði upp gegn Southampton. Framúrskarandi.

Sóknarmaður: Yoane Wissa (Brentford) - Tvö mörk í viðbót frá Wissa sem hefur verið funheitur. Brentford vann 3-2 gegn Bournemouth.

Sóknarmaður: Alexander Isak (Newcastle) - Mark og stoðsending gegn Forest. Þegar Isak er í stuði er Newcastle í stuði.

Stjóri: Gary O'Neil (Wolves): - Skilaði nauðsynlegum sigri gegn Southampton með alla þessa pressu á sér.