Moukoko er eftirsóttur og hefur m.a. verið fjallað um áhuga Newcastle og Chelsea á leikmanninum. Þá hefur Barcelona einnig áhuga. Newcastle er sagt hafa lagt fram munnlegt tilboð í Moukoko þar sem honum voru boðin 150 þúsund pund í vikulaun, 35 sinnum hærri laun en hann er með í dag. Þar sem minna en sex mánuðir eru eftir af samningnum mega önnur félög ræða við leikmanninn.

150 þúsund pund í vikulaun er eitthvað sem Dortmund getur ekki jafnað í sínum viðræðum við leikmanninn. Hans-Joachim Watzke, stjórnarformaður Dortmund, tjáði sig um Moukoko í viðtali við Sky Sport Germany. Hann virðist aðeins skjóta á unga kappann.

„Ég byrjaði fyrir átján árum og gekk á þeim tíma út frá því að stundum hefði þakklæti ákveðið vægi, en ég er hættur því fyrir löngu," sagði Watzke.

„Þakklæti er ekki gjaldeyrir í fótboltaheiminum. Þannig er staðan, sem er sorglegt. Ég mun ekki halda því gegn neinum því viðskipti eru eins og þau eru."

„Þetta er ekki venjulegt mál. Munurinn á þessu og öðru er að hann er átján ára núna og var á HM sem vekur enn meiri athygli á honum."

„Það er algjörlega rökrétt að hann sé núna að reyna komast í góða stöðu fyrir sjálfan sig. En það er líka rökrétt að við erum með okkar hugmyndir."

„Ef það tvennt fer ekki saman þá mun samstarfið ekki halda áfram. Við vonum að hann verði áfram hjá okkur," sagði Watzke.

Á tímabilinu hefur Watzke skorað sex mörk í fjórtán leikjum í Bundesliga og var, eins og Watzke kom inn á, hluti af þýska landsliðshópnum á HM í Katar. Hann á að baki tvo leiki með þýska landsliðinu og hefur skorað sex mörk í fimm leikjum með U21 landsliðinu.