Fylkir er komið á toppinn í Lengjudeildinni eftir 1-0 sigur á Völsungi á Húsavík í dag. Fótbolti.net ræddi við Heimi Guðjónsson, þjálfara Fylkis, eftir leikinn.
Lestu um leikinn: Völsungur 0 - 1 Fylkir
„Ekki okkar besti leikur en andstæðingurinn var öflugur, gríðarlega baráttuglaðir og vel skipulagðir. Mér fannst við sterkari aðilinn i leiknum en náðum ekki að opna þá nógu mikið en þrjú stig. Frábært veður, frábær völlur og frábært vallarstæði þannig þetta var allt jákvætt," sagði Heimir.
„Við náðum ekki að opna þá nógu mikið en engu að síður var hugarfarið til fyrirmyndar. Við vildum þetta þannig við erum ánægðir með sigurinn."
Guðmundur Tyrfingsson skoraði eina mark leiksins úr vítaspyrnu sem heimamenn voru ekki sáttir með.
„Ég hef ekki séð þetta aftur. Ég held að þetta hafi verið víti en ég ætla ekki að fullyrða það. Ég stóð langt frá þessu og á eftir að sjá þetta aftur," sagði Heimir.
