Marc Cucurella leikmaður Chelsea og spænska landsliðsins hefur tjáð sig um miklar áskoranir sem hann hefur þurft að sigrast á hjá enska liðinu.
Cucuella gekk til liðs við Chelsea frá Brighton sumarið 2022. Hann sagði í viðtali við The Athletic að það fylgir því miklu meiri pressa að spila með liði eins og Chelsea þar sem ætlast er til að vinna alla leiki.
Chelsea hefur verið í miklum vandræðum innan vallar undanfarið og hefur Cucurella fengið sinn skerf af gagnrýni. Hann hefur einnig verið í miklum vandræðum utan vallar.
„Ég átti í miklum vandræðum. Ég var á hóteli fyrstu tvo mánuðina ásamt fjölskyldu minni, fljótlega eftir að við fundum stað til að búa á var brotist inná heimilið okkar. Svo var ég á spítala í tvo daga út af því ég veiktist," sagði Cucurella.
„Ég missti nokkur kíló og þurfti að byrja upp á nýtt til að koma mér í form. Það var ekki auðvelt að koma til baka. Liðið gat heldur ekki fundið taktinn á vellinum."
„Að lokum þá gagnrýndu stuðningsmennirnir mig og aðra liðsfélaga út af verðmiðanum á okkur, það hefur ekkert með mig að gera. Ef þessi peningur hefði farið beint í vasann hjá mér hefði þetta kannski verið sanngjarnt. Fólk ætlast til þess að maður sé vél þegar maður kostar svona mikið," sagði Cucurella að lokum.
Cucurella hefur verið stórkostlegur í spænska liðinu sem mun spila í úrslitum á EM gegn Englandi á morgun.
