Melkorka átti virkilega góðan leik í hjarta varnarinnar hjá FH
„Þetta eru ekkert smá mikilvæg stig og ótrúlega sætur sigur,“ sagði Melkorka Katrín Fl Pétursdóttir, miðvörður FH, eftir 1-0 sigur á Fylki fyrr í kvöld.
Lestu um leikinn: Fylkir 0 - 1 FH
Það var hart barist um stigin þrjú sem voru í boði í kvöld en Fylkisliðið er í bullandi fallbaráttu og þurfti nauðsynlega á stigum að halda. Melkorka var mjög ánægð með að ná þremur stigum á móti liði í slíkri stöðu.
„Þær komu mjög grimmar í þetta og þetta var upp á líf eða dauða hjá þeim. Þess vegna er mjög sterkt að ná þremur stigum núna.“
Sigurmark leiksins kom ekki fyrr en á lokamínútunni en Melkorka hafði alltaf trú á að FH myndi vinna leikinn.
„Mér fannst þetta alltaf liggja í loftinu. Við áttum þetta alveg 100% skilið. Maður var eiginlega bara að bíða eftir markinu og það var mjög sætt að fá það þarna í lokin.“
Með sigrinum kemst FH í 18 stig og í þægilega stöðu um miðja deild. Hvorki í topp- né botnbaráttu. Melkorka segir FH-konur engu síður harðákveðnar í að safna fleiri stigum.
„ Við erum allar með brjálað keppnisskap og viljum fleiri stig.“
Hægt er að horfa á allt viðtalið við varnarmanninn efnilega í sjónvarpinu hér að ofan.
Athugasemdir
