Það voru nokkrir Íslendingar sem komu við sögu í leikjum dagsins víða um Evrópu.
Davíð Kristján Ólafsson kom inn af bekknum þegar Cracovia var 0-1 undir á heimavelli gegn Korona Kielce í efstu deild pólska boltans. Cracovia tókst að jafna á lokakaflanum til að bjarga stigi og er liðið í fjórða sæti sem stendur, fjórum stigum frá Evrópusæti.
Hólmbert Aron Friðjónsson kom þá inn af bekknum í 2-0 tapi Preussen Münster gegn Paderborn í næstefstu deild þýska boltans. Hólmbert og félagar eru tveimur stigum fyrir ofan fallsæti, með 20 stig eftir 22 umferðir.
Kristian Nökkvi Hlynsson lék allan leikinn í 1-0 tapi Sparta Rotterdam á útivelli gegn Go Ahead Eagles. Nökkvi Þeyr Þórisson fékk að spila síðustu 20 mínúturnar en tókst ekki að bjarga stigi fyrir gestina.
Sparta er í fallsæti, með 20 stig eftir 23 umferðir - fjórum stigum frá öruggu sæti.
Í Sameinuðu arabísku furstadæmunum sigruðu lærisveinar Milos Milojevic á útivelli gegn Al-Nasr. Þetta er annar sigurinn í röð í deildinni og er Al-Wasl í þægilegri stöðu í sjöunda sæti.
Að lokum fóru æfingaleikir fram þar sem Ham-Kam, Kolding, Esbjerg, Stromsgodset og Horsens mættu öll til leiks.
Cracovia 1 - 1 Korona Kielce
Paderborn 2 - 0 Preussen Munster
G.A. Eagles 1 - 0 Sparta Rotterdam
Al-Nasr 0 - 1 Al-Wasl
Ham-Kam 2 - 2 Bryne
Kolding 2 - 0 Vendsyssel
Esbjerg 3 - 0 BK Frem
Stromsgodset 0 - 0 Horsens
Athugasemdir
