Lestu um leikinn: Fjölnir 0 -  2 Þór

Fjölnir tók á móti Þór í 16-liða úrslitum Mjólkurbikarsins og var leikið á gervigrasinu í Egilshöllinni þar sem heimavöllur Fjölnis er ekki tilbúinn fyrir sumarið.

Fyrri hálfleikurinn var tíðindalítill þar sem Þórsarar byrjuðu betur en Fjölnismenn unnu sig inn í leikinn og fengu besta færi fyrri hálfleiksins, þegar Axel Freyr Harðarson komst í dauðafæri en Aron Birkir Stefánsson varði frábærlega.

Heimamenn gerðu tvöfalda skiptingu í leikhlé og byrjuðu seinni hálfleikinn af krafti. Þeim tókst þó ekki að nýta þann kraft og fengu þeir mark í andlitið skömmu síðar. Ingimar Arnar Kristjánsson slapp fyrst í gegn og setti boltann framhjá úr dauðafæri en skömmu síðar slapp hann aftur í gegn, í þetta sinn eftir langa sendingu upp völlinn, og skoraði.

Halldór Snær Georgsson kom af marklínunni en tapaði kapphlaupinu. Ingimar var fyrri til boltans og skallaði hann yfir Halldór og í autt netið.

Leikurinn róaðist niður næstu 20 mínúturnar þar sem Þórsarar gerðu afar vel í að stöðva uppspil Fjölnis, allt þar til á 79. mínútu þegar Ingimar tvöfaldaði forystuna. Hann fékk laglega sendingu yfir varnarlínu Fjölnis og smellhitti boltann með viðstöðulausu skoti sem fór í stöngina og hinn.

Ingimar komst nálægt því að fullkomna þrennuna en tókst ekki á meðan heimamenn komust ekki nálægt því að minnka muninn. Lokatölur urðu 0-2 fyrir Þór sem heldur áfram í 8-liða úrslit Mjólkurbikarsins.

Ingimar Arnar Kristjánsson skoraði bæði mörk Þórs frá Akureyri sem varð fyrsta liðið til að tryggja sig í 8-liða úrslit @mjolkurbikarinn með 0-2 sigri á Fjölni???? pic.twitter.com/J9AkzlSo3i

— RÚV Íþróttir (@ruvithrottir) May 14, 2024