Pochettino: Vil ekki þurfa að nota afsakanir á næstu leiktíð

Hann býst við að vera áfram við stjórnvölinn hjá Chelsea, en hann vill ekki þurfa að hafa neinar afsakanir fyrir slöku gengi á næstu leiktíð eins og hefur verið á þessu tímabili.

„Á næstu leiktíð þá vil ég ekki þurfa að nota afsakanir eins og að við erum með ungt lið eða að glíma við mikið af meiðslum," sagði Pochettino meðal annars.

„Við erum að gera stórkostlega hluti á þessu tímabili miðað við aðstæður. Við höfum þurft að glíma við margt á erfiðri leiktíð en það mikilvægasta fyrir okkur er að halda rónni, leggja mikið á okkur og virkilega trúa á verkefnið."

Chelsea er í sjöunda sæti ensku úrvalsdeildarinnar sem stendur og er í harðri baráttu um Evrópusæti. Það leit ekki út fyrir að Chelsea ætti möguleika á Evrópusæti fyrr á leiktíðinni en liðinu hefur gengið afar vel á undanförnum mánuðum.