Ítalía í dag - Napoli og Juventus mæta til leiks

Napoli byrjar daginn á útivelli gegn Verona áður en Juventus tekur á móti Sassuolo.

Napoli er búið að missa Kalidou Koulibaly, Dries Mertens og Lorenzo Insigne á síðustu mánuðum á meðan Juve er búið að missa gríðarlega marga leikmenn á borð við Matthijs de Ligt, Giorgio Chiellini, Alvaro Morata og Paulo Dybala.

Helsti munurinn er sá að Juve er búið að fá nýja leikmenn inn en það gengur ekki jafn vel hjá Napoli. Juve er búið að næla í Bremer, Filip Kostic, Paul Pogba og Angel Di Maria í sumar á meðan Napoli hefur einungis tekist að krækja í talsvert óþekktari leikmenn.

Andstæðingar stórveldanna eru alls ekki einfaldir og sérstaklega ekki Verona sem hefur endað í efri hluta deildarinnar öll þrjú árin síðan félagið kom upp úr B-deildinni.

Sassuolo hefur átt svipuðu gengi að fagna og Verona en félagið er búið að missa lykilmann í sumar og gæti misst einn eða tvo í viðbót. West Ham keypti Gianluca Scamacca og eru félög sem hafa áhuga á Giacomo Raspadori og Junior Traore.

Domenico Berardi hefur þá einnig verið orðaður við félagsskipti en Sassuolo er búið að krækja í framherjana Agustin Alvarez og Andrea Pinamonti í sumar auk kantmanna og miðjumanna.

Leikir dagsins:
16:30 Verona - Napoli (Stöð 2 Sport 2)
18:45 Juventus - Sassuolo (Stöð 2 Sport 2)